RÚV okkar allra
Hér upplýsum við um starfsemina, bjóðum upp á samtal og svörum spurningum þínum

Hugmyndadagar RÚV verða haldnir í sjötta sinn

Mynd með færslu
 Mynd: RÚV
Hugmyndadagar RÚV verða haldnir 14.-15. október. Hugmyndasmiðum, höfundum, framleiðendum og öðrum gefst þá kostur á að kynna dagskrárstjórum RÚV hugmyndir sínar og tillögur að dagskrárefni. Frestur til að koma hugmyndum og tillögum á framfæri er til og með 27. september.

Hugmyndadagar RÚV eru tvisvar á ári og voru fyrst haldnir í október 2017.  Rúmlega 1.100 hugmyndir hafa borist frá upphafi og um 340 hópar og einstaklingar verið boðaðir í Útvarpshúsið til að kynna tillögur sínar. Á fimmta tug verkefna hafa þegar orðið að veruleika, eru í þróun eða í frekari skoðun. Markmiðið er að auka enn á fjölbreytnina í dagskrárframboði RÚV, opna á hugmyndaþróun og styrkja tengsl RÚV vði sjálfstæða framleiðendur. Meðal hugmynda sem hafa orðið að veruleika í framhaldi af Hugmyndadögum eru þættir á borð við Árný og Daði í Kambódíu, Hinseginleikinn, Smá pláss, Fólkið á bak við flóttann, Ólétta stelpan, Ymur, Ekkert skiptir máli, Íslenska mannflóran, Hyldýpi og Fallnar borgir

Auglýst er eftir tillögum að dagskrárefni af öllu tagi fyrir alla miðla RÚV; í sjónvarp, útvarp og á vef. Í þetta sinn kallar sjónvarpið sérstaklega eftir tónlistarþáttum og þáttum fyrir ungt fólk.

Frestur til að koma hugmyndum og tillögum á framfæri er til og með 27. september. Unnið verður úr innsendum hugmyndum og völdum hópi boðið að kynna dagskrárstjórum hugmyndir sínar á Hugmyndadögum 14.-15. október. Framleiðslufyrirkomulag og annað er opið til frekari umræðu, RÚV framleiðir hluta af dagskrárefni sínu sjálft en vinnur annað í samstarfi við aðra.

Nánari upplýsingar og umsóknarform má finna á vef Hugmyndadaga.

15.09.2020 kl.15:58
vefritstjorn's picture
Vefritstjórn
Birt undir: Í umræðunni