Færeyingar langeygir eftir að losna af rauða listanum

Mynd með færslu
 Mynd: Unsplash
Það tekur of langan tíma að hreinsa Færeyinga af rauða lista Norðmanna sem veldur færeyskum verkamönnum í Noregi miklum vanda.

Þetta sagði heilbrigðisráðherra Færeyja, Kaj Leo Holm Johannesen á fundi Norrænu ráðherranefndarinnar í vikunni. Norðurlöndin þurfa að vera sveigjanlegri í garð hvers annars ætli þau að halda áfram að koma fram sem sjálfbærir samherjar segir ráðherrann.

Hann kveðst hafa skilning á að hvert ríki þurfi að gæta sín gagnvart útbreiðslu kórónuveirunnar en mikilvægt sé að opna landamæri umsvifalaust og ógnin af henni er að baki.

Fyrr í september fór ráðherrann þess á leit við norskan starfsbróður sinn að fjarlægja Færeyjar af lista yfir þau ríki þar sem útbreiðsla Covid-19 er mikil. Nú eru færri en tíu virk smit í eyjunum en enn eru þær á rauða listanum.

Norræna ráðherraráðið hittist á fjarfundi í vikunni, þar sem áskoranir og framtíðaráætlanir voru ræddar. Viðbrögð við heimsfaraldrinum voru ofarlega á baugi í máli ráðherranna.

markusthth's picture
Markús Þ. Þórhallsson
Fréttastofa RÚV
Síðast:
Þessi þáttur er í hlaðvarpi