Brýnt að opna starfsstöð Vinnumálastofnunar á Húsavík

10.09.2020 - 17:42
Mynd með færslu
 Mynd: Maarten Wijnants - Unsplash
Byggðarráð Norðurþings telur að aukið atvinnuleysi og yfirvofandi uppsagnir auki þörfina fyrir úrræði Vinnumálastofnunar í sveitarfélaginu. Því skorar byggðarráð á stofnunina að opna starfsstöð á Húsavík.

Starfsstöð Vinnumálastofnunar var starfrækt á Húsavík til ársins 2014, en var þá lokað þar sem ekki var lengur talin þörf fyrir starfsemina. Byggðarráð Norðurþings bendir á að horfur í atvinnumálum í sveitarfélaginu séu nú með þeim hætti að vaxandi þörf sé fyrir úrræði Vinnumálastofnunar.

Atvinnuleysi með því mesta á Norðurlandi eystra

„Atvinnuleysi er að aukast í Norðurþingi og er með því sem mest gerist á Norðurlandi eystra. Gera má ráð fyrir að þegar líður á haustið fari uppsagnir í iðnaði og ferðaþjónustu að gera vart við sig í meira mæli og að atvinnuleysi verði þá umtalsvert meira en þegar er orðið,“ segir í bókun byggðarráðs í dag.

Brýnt að opna starfsstöð á ný á Húsavík

Þá bendir byggðarráðið á að ríkisstjórnin sé að efla viðspyrnu á mörgum vígstöðvum, meðal annars í gegnum Vinnumálastofnun og þau úrræði sem þar eru rekin. „Í ljósi þess verður ekki annað séð en að brýnt sé að Vinnumálastofnun opni á ný starfstöð á Húsavík til að stofnunin geti rækt lögbundnar skyldur sínar við atvinnuleitendur í sveitarfélaginu og nærsveitarfélögum sem snúa að vinnumiðlun, mati á vinnufærni, þátttöku atvinnuleitenda í vinnumarkaðsaðgerðum og eftirliti þar á.“

Í samræmi við stefnu stjórnvalda um fjölgun starfa

Byggðarráð telur opnun starfsstöðvar Vinnumálstofnunar á Húsavík í samræmi við stefnu stjórnvalda um fjölgun starfa á landsbyggðinni. Eðlilegt umfang slíkrar starfsemi væru tveir starfsmenn sem ýmist hefðu viðveru á starfsstöð á Húsavík eða ferðuðust innan Þingeyjarsýslu í þjónustu við atvinnuleitendur með viðtölum, námskeiðum og vinnumiðlun.

agusto's picture
Ágúst Ólafsson
Fréttastofa RÚV
Síðast:
Þessi þáttur er í hlaðvarpi