Mynd: Kveikur - RÚV
Athugið þessi frétt er meira en 11 mánaða gömul.
Krabbameinsfélagið krefst að fréttir verði fjarlægðar
Krabbameinsfélagið krefst þess að fréttir, þar sem starfsmaður, sem gerði mistök við greiningu leghálssýnis, er nafngreindur verði fjarlægðar. Starfsmaðurinn kom fram undir nafni í viðtali við Mannlíf í gær og birtist fréttin í kjölfarið í fleiri fjölmiðlum. Mistökin urðu til þess að leghálskrabbamein konu á fimmtugsaldri greindist ekki og er það nú ólæknandi.
Krabbameinsfélagið hefur legið undir ámæli fyrir að hafa greint frá því að mistökin hafi verið gerð af einum starfsmanni. Í frétt á vef félagsins segir að það hafi ekki verið gert til að koma sök á starfsmanninn, heldur til að skýra í hverju mistökin fólust.
Þegar málið kom til tals í fjölmiðlum hafi félagið gert allt sem í valdi þess stóð til að forðast að draga starfsmanninn inn í umræðuna. Þá hafi félagið aldrei haldið því fram að viðkomandi starfsmaður bæri þessa ábyrgð heldur tekið á sig fulla ábyrgð.
Í gær afhentu Sjúkratryggingar Íslands Krabbameinsfélaginu skjal, þar sem fjallað er um árangur af þjónustusamningi Sjúkratrygginga við félagið, en María Heimisdóttir forstjóri Sjúkratrygginga sagði í fréttum Sjónvarps í gær að fara þurfi yfir hvernig skjalið kom til, hverjir sáu það og í hvaða ferli það fór.
Skjalið verður rætt á sameiginlegum fundi með landlækni í dag en Krabbameinsfélagið hefur krafist þess að sjúkratryggingar afhendi félaginu gögn um hæfni þess til að sinna hlutverki sínu eftir að Tryggvi Björn Stefánsson skurðlæknir sagði í Kastljósi á fimmtudagskvöld að hann hefði upplýsingar um að gæðaeftirilit og skráning væri í molum.
