Athugið þessi frétt er meira en 1 ára gömul.

Icelandair fær aðild að bókunarkerfi easyJet

08.09.2020 - 16:08
epa03553318 (FILE) A file photo dated 27 June 2011 showing airplanes from the British airline Easyjet at Berlin-Schoenefeld Airport in Schoenefeld, near Berlin, Germany. British budget carrier easyJet on 24 January 2013 reported total revenue for the
 Mynd: EPA - DPA FILE
Icelandair hefur gert samstarfssamning við breska flugfélagið easyJet um aðild að stafrænni bókunarþjónustu easyJet, Worldwide by easyJet. Bókunarþjónustan tengir saman yfir fimm þúsund flugleiðir víða um heim með neti 17 samstarfsflugfélaga.

Í tilkynningu frá Icelandair kemur fram að gert sé ráð fyrir að þjónustan verði virk á næstu vikum og þegar markaðsaðstæður leyfa. Farþegar geti sömuleiðis bókað flug frá áfangastöðum easyJet í Evrópu og áfram inn í leiðakerfi Icelandair til fjölmargra áfangastaða bæði í Evrópu og Norður Ameríku í nánustu framtíð. 

Icelandair á nú þegar í samstarfi við önnur flugfélög á borð við SAS, Finnair og airBaltic í Evrópu og Jetblue og Alaska Airlines í Bandaríkjunum, segir í tilkynningu. „Það er ánægjulegt að taka upp samstarf við easyJet og fjölga þannig öflugum samstarfsaðilum Icelandair. Með þessari þjónustu koma viðskiptavinir easyJet til með að geta nýtt sér öflugar tengingar inn á áfangastaði okkar í Evrópu og Norður Ameríku á einfaldan hátt. Þessi samningur styrkir um leið leiðakerfi og tekjuflæði Icelandair og gefur okkur möguleika á að fjölga farþegum til Íslands og einnig í tengiflugi yfir hafið,“ segir Bogi Nils Bogason, forstjóri Icelandair.

 

„Við erum mjög ánægð með að Icelandair bætist í hóp samstarfsflugfélaga easyJet Worldwide. Tugir milljóna flugfarþega ferðast á ári hverju til og frá Evrópu og Icelandair er án efa kærkomin viðbót fyrir viðskiptavini okkar sem eru að leita að góðum og einföldum tengingum milli Evrópu og Norður Ameríku,“ segir Johan Lundgren, forstjóri easyJet. 

 

Ásrún Brynja Ingvarsdóttir
Fréttastofa RÚV