Rannsókn að hefjast á andláti Daniels Prude

epa03509079 Hoboken Police occupy a crime scene believed to be related to the mass shooting at Sandy Hook Elementary School in Newtown, Connecticut in Hoboken New Jersey, USA, 14 December 2012.Multiple deaths were reported in a shooting at a US elementary
 Mynd: EPA
Saksóknari í New York ríki í Bandaríkjunum hefur fyrirskipað rannsókn á andláti Daniels Prude sem lést eftir handtöku í mars síðastliðnum.

Að sögn fjölskyldu Prudes lést hann á sjúkrahúsi viku eftir að hann var handtekinn í borginni Rochester. Fjölskyldan gerði atvikið heyrinkunnugt á miðvikudag eftir að hafa fengið upptöku úr búkmyndavél lögreglumanns í hendur.

Á upptökunni má sjá lögreglumennina koma upp að Prude, nöktum og óvopnuðum úti á götu. Hann var auðsveipur að sjá í upphafi en komst í uppnám eftir að hann var handjárnaður.

Lögreglumennirnir settu þá hettu yfir höfuð hans, sem sögð er hafa átt að koma í veg fyrir að hann hrækti á þá. Skömmu síðar missti hann meðvitund og var fluttur á sjúkrahús. Þar lést hann viku síðar þegar slökkt var á öndunarvél sem hélt honum á lífi. 

BBC greinir frá að Michael Mazzaeo talsmaður stéttarfélags lögreglumanna í Rochester segi lögreglumennina hafa fylgt öllum reglum við handtökuna. Þeir hafi ekki ætlað sér að skaða Prude, en hafi staðið frammi fyrir því að aðstoða mann sem virtist andlega veikur. 

Saksóknarinn Letita James tilkynnti ákvörðun sína daginn eftir að mótmælendum og lögreglu laust saman í Rochester. Andrew Cuomo ríkisstjóri New York fagnaði ákvörðun saksóknarans.

Fjölmiðlar í Rochester segja niðurstöður krufningar leiða í ljós að Daniel Prude hafi dáið af völdum súrefnisskorts. 

markusthth's picture
Markús Þ. Þórhallsson
Fréttastofa RÚV
Síðast:
Þessi þáttur er í hlaðvarpi