Athugið þessi frétt er meira en 11 mánaða gömul.

Niðurstaða gerðardóms „mikil vonbrigði“

Mynd með færslu
 Mynd: Landspítali/Þorkell Þorkelsso
Niðurstaða gerðardóms frá því í gær, um kjör hjúkrunarfræðinga, er „mikil vonbrigði“. Þetta kemur fram í yfirlýsingu sem Félag íslenskra hjúkrunarfræðinga sendi frá sér síðdegis. Þar segir að mun meira hafi þurft til og að stjórn félagsins harmi „að gerðardómur hafi ekki stigið það mikilvæga skref að leiðrétta laun hjúkrunarfræðinga.“

Gerðardómur úrskurðaði í gær að íslenska ríkið skuli leggja Landspítalanum og öðrum heilbrigðisstofnunum með almenna hjúkrunarfræðinga við störf aukna fjármuni, til að bæta kjör hjúkrunarfræðinga á grundvelli stofnanasamnings. Samkvæmt niðurstöðu gerðardóms skal ríkið veita 900 milljónir króna á ári til Landspítalans frá og með deginum í gær til loka gildistíma kjarasamnings hjúkrunarfræðinga hjá ríkinu.

Sjá einnig: Gerðardómur: Aukið fjármagn til að bæta kjör

Aðrar heilbrigðisstofnanir fá 200 milljónir króna í hlutfalli við þann meðalfjölda stöðugilda hjúkrunarfræðinga sem störfuðu á hverri stofnun fyrir sig í fyrra. Í fjárhæðunum felst heildarviðbótarframlag til spítalans að meðtöldum launatengdum gjöldum. 

Ekki í samræmi við ábyrgð

Í yfirlýsingu Félags íslenskra hjúkrunarfræðinga segir að niðurstaðan hafi ekki tekið mið af ýmsum rökum sem fram komi í greinargerð dómsins, sem nýta hefði mátt til þess að bæta launasetningu hjúkrunarfræðinga og hækka umtalsvert laun „þessarar mikilvægu kvennastéttar innan heilbrigðiskerfisins.“ 

„Í greinargerð gerðardóms kemur meðal annars fram að vísbendingar séu um að hjúkrunarfræðingar séu vanmetin kvennastétt þegar kemur að launasetningu. Sömuleiðis að ekki sé verið að greiða hjúkrunarfræðingum laun í samræmi við ábyrgð í starfi,“ segir í yfirlýsingunni.

Niðurstaða gerðardóms sé sú að ríkið veiti heilbrigðisstofnunum sem hjúkrunarfræðingar starfa á fjármagn til endurskoðunar á stofnanasamningum hjúkrunarfræðinga. Útfærsla á niðurstöðu gerðadóms sé nú í höndum stjórnenda heilbrigðisstofnanna í samvinnu við Félag íslenskra hjúkrunarfræðinga með útfærslu innan stofnanasamninga. Mikilvægt sé að sú vinna gangi fljótt og örugglega.

„Með þessu hefur gerðardómur ýtt verkefninu til baka í nærumhverfið á stofnunum. Rúmlega einn milljarður, sem er fjárhæð með launatengdum gjöldum, mun deilast á nærri 2.700 hjúkrunarfræðinga sem starfa hjá ríkinu. Fjárhæðin dugir ekki til þess að leiðrétta laun vanmetinnar kvennastéttar til samræmis við aðrar viðmiðunarstéttir eða tryggja að hjúkrunarfræðingar fái laun í samræmi við ábyrgð í starfi. Stór hluti af fjármagninu er auk þess þegar bundinn í að tryggja þau sértæku úrræði sem  einstaka stofnanir hafa gripið til síðustu ár. Mun meira hefði þurft til og harmar stjórn Fíh að gerðardómur hafi ekki stigið það mikilvæga skref að leiðrétta laun hjúkrunarfræðinga,“ segir í yfirlýsingunni.