Athugið þessi frétt er meira en 6 mánaða gömul.

Leitarhundur lögreglu fann fíkniefni fyrir tilviljun

01.09.2020 - 10:23
Mynd með færslu
 Mynd: Kristinn Þeyr Magnússon - RÚV
Buster, leitarhundur lögreglunnar á Suðurnesjum, fann um helgina fíkniefni fyrir hálfgerða tilviljun. Í tilkynningu frá lögreglunni segir að þegar verið var að viðra Buster á vegslóða við Reykjanesbraut hafi hann vakið athygli lögreglumanns á bíl sem var kyrrstæður á slóðanum. Hundurinn hafi meðal annars tekið eftir álpappír við bílinn. 

Í tilkynningurinni segir að ökumaður bílsins hafi ekki verið hrifinn af afskiptum hundsins, enda hafi komið í ljós að hann var með kannabisefni í vörslum sínum. Maðurinn var handtekinn og færður á lögreglustöð.

„Annar ökumaður sem lögregla tók úr umferð vegna gruns um fíkniefnaakstur reyndist jafnframt vera með fíkniefni, vopn og þýfi í bifreiðinni.  Um var að ræða hnúajárn og kylfu annars vegar og m.a. tvö rafmagnshlaupahjól, tölvu og ipad hins vegar. Í ljós kom að tölvan er úr innbroti sem framið var fyrr á árinu,“ segir í tilkynningu lögreglunnar.

Þá kemur ennfremur fram í tilkynningunni að í gærmorgun hafi verið tilkynnt um að brotist hefði verið inn í fjóra gáma á byggingarsvæði í Njarðvík. Ekki sé ljós hvort eða þá hve miklu var stolið úr þeim.

 

johann's picture
Jóhann Bjarni Kolbeinsson
Fréttastofa RÚV