Athugið þessi frétt er meira en 11 mánaða gömul.

Íslensk-pólsk spennumynd í tökum á Íslandi

Tökur standa nú yfir á kvikmyndinni Wolka í leikstjórn Árna Ólafs Ásgeirssonar en myndin er íslenskt/pólskt spennudrama. Meðal leikara í myndinni eru pólska leikkonan Olga Bołądź sem fer með hlutverk Önnu, Janusz Cieciera, Eryk Lubos, Anna Moskal og íslenski leikarinn Guðmundur Þorvaldsson. Framleiðendur myndarinnar eru Hilmar Sigurðsson og Beggi Jónsson hjá Sagafilm og Stanislaw Dziedzic hjá Film Produkcja í Póllandi.
 Mynd: Sagafilm

Íslensk-pólsk spennumynd í tökum á Íslandi

01.09.2020 - 14:04

Höfundar

Tökur standa nú yfir á kvikmyndinni Wolka í leikstjórn Árna Ólafs Ásgeirssonar. Myndin er pólskt-íslenskt samstarfsverkefni og segir frá konu sem þarf að grípa til örþrifaráða er hún losnar úr 16 ára prísund í pólsku fangelsi.

Sagafilm á Íslandi og Film Produkcja í Póllandi koma að framleiðslu myndarinnar Wolka.  Í tilkynningu frá Sagafilm segir að tökur séu komnar vel á veg á Íslandi en framleiðslan færi sig síðan til Póllands í byrjun september.

Wolka fjallar segir frá Önnu sem setið hefur í pólsku fangelsi í 16 ár. Þegar hún losnar þaðan á hún sér aðeins eitt markmið; að finna konu að nafni Dorota. Til þess þarf Anna hinsvegar að brjóta skilorð, brjóta lög og leggja allt undir þegar hún kemst að því að Dorotu sé líklega að finna á Íslandi.

„Það er gaman að segja frá því að þetta er í fyrsta sinn í íslenskri kvikmyndasögu sem að sögusviðið fjallar um veruleika minnihlutahóps á Íslandi,“ segir Hilmar Sigurðsson einn af framleiðendum myndarinnar og forstjóri Sagafilm. „Við erum auðvitað ánægð að tökur hafi gengið að mestu leyti vel þrátt fyrir breytingar á sóttvarnaráherslum á Íslandi á miðri leið við tökur. Við fylgjum ítrustu leiðbeiningum og höfum átt í mjög góðri samvinnu við Sóttvarnalækni og Heilbrigðisráðuneytið við að finna lausnir sem gera okkur kleyft að starfa áfram. Það eru yfir 25 manns sem hafa komið frá Pólandi í tengslum við tökurnar. ”

Meðal leikara í myndinni eru pólska leikkonan Olga Bołądź sem fer með hlutverk Önnu, Janusz Cieciera, Eryk Lubos, Anna Moskal og íslenski leikarinn Guðmundur Þorvaldsson. Framleiðendur myndarinnar eru Hilmar Sigurðsson og Beggi Jónsson hjá Sagafilm og Stanislaw Dziedzic hjá Film Produkcja í Póllandi.

„Við erum ánægð með að fara af stað með verkefnið þrátt fyrir erfiðleika í undirbúningnum. Það gleður mig að taka þátt í tökum á Íslandi þar sem ég hef aldrei gert áður.  Leikarar og aðrir starfsmenn framleiðslunnar hlakkaði mikið til að taka koma til Íslands og taka þátt í myndinni,“ bætir Stanislaw Dziedzic, framleiðandi Film Produkcja, við.

Framleiðsla kvikmyndarinnar er styrkt af Kvikmyndamiðstöð Íslands, Polish Film Institute og það er þýska dreifingarfyrirtækið ARRI Media International sér um dreifingarréttinn á heimsvísu en Monolith fer með réttinn í Póllandi. Kvikmyndin verður síðan sýnd hérlendis á næsta ári.