Athugið þessi frétt er meira en 8 mánaða gömul.

Mun greina efnahagsleg áhrif valkosta í sóttvarnarmálum

Mynd með færslu
 Mynd: RÚV - Grímur Sigurðsson - RÚV
Fjármála- og efnahagsráðherra hefur skipað starfshóp sem vinna mun reglulegar greiningar á efnahagslegum áhrifum valkosta í sóttvarnarmálum, með tilliti til hagsmuna ólíkra samfélagshópa og geira hagkerfisins.

Þetta kemur fram í færslu á vef Stjórnarráðsins. Þar segir að metin verði skammtímaáhrif vegna faraldursins sem og áhrif hans á hagkerfið til lengri tíma. 

Starfshópinn skipa Már Guðmundsson, fyrrverandi seðlabankastjóri, Tómas Brynjólfsson, skrifstofustjóri skrifstofu efnahagsmála í fjármála- og efnahagsráðuneytinu og Ásdís Kristjánsdóttir, aðstoðarframkvæmdastjóri Samtaka atvinnulífsins. Þá mun Benedikt Árnason, skrifstofustjóri í forsætisráðuneytinu, starfa með hópnum

Fjármálaráðuneytið birti minnisblað um umfang sóttvarnaaðgerða á landamærunum, bæði í júní þegar losað var um hömlur og í ágúst þegar aðgerðir voru hertar. „Í ljósi þess að áhrifa faraldursins mun gæta að minnsta kosti næstu mánuði [...] þurfa viðbrögð stjórnvalda að vera í stöðugri endurskoðun,“ segir í færslunni. „Mikilvægt er að unnin verði frekari greining á efnahagslegum kostnaði og ábata ólíkra sóttvarnaraðgerða og þeim valkostum sem helst kunna að koma til álita,“ segir jafnframt.