Athugið þessi frétt er meira en 1 ára gömul.

133 sagt upp hjá Isavia

Mynd með færslu
Ferðamaður á Keflavíkurflugvelli. Mynd úr safni. Mynd: Kristinn Þeyr Magnússon - RÚV
133 starfsmönnum Isavia var sagt upp í dag og 12 til viðbótar var boðið að lækka starfshlutfall sitt. Uppsagnirnar í dag koma til viðbótar því að 101 starfsmanni var sagt upp störfum í lok mars og hefur störfum hjá Isavia þar með fækkað um 40% frá því Covid-19 faraldurinn hófst.

Guðjón Helgason, upplýsingafulltrúi Isavia, segir í samtali við fréttastofu að sá hópur starfsmanna móðurfélags Isavia sem aðgerðirnar í dag höfðu mest áhrif á starfsfólk í öryggisleit.

Fram kemur í tilkynningu Isavia að gripið hafi verið til umfangsmikilla aðgerða vegna þess samdráttar sem orðið hefur í flugi til og frá landinu í heimsfaraldrinum. Aðgerðirnar eru sagðar snerta öll svið félagsins.

Auk uppsagnanna hefur verið gripið til ýmissa annarra hagræðingaaðgerða og skipulagsbreytinga, svo sem sameiningu sviða og fækkunar í framkvæmdastjórn félagsins.

„Eftir ágætis gang í sumar, þar sem fjölgun ferðamanna um Keflavíkurflugvöll var nokkuð stöðug, þá varð alger viðsnúningur í kjölfar ákvörðunar um tvöfalda skimun með sóttkví á milli, “ er haft eftir Sveinbirni Indriðason, forstjóra Isavia í tilkynningunni.

Flugfélög hafi dregið verulega úr framboði og ekki sé útlit fyrir að það breytist í náinni framtíð. „Forsendur okkar frá í sumar eru því brostnar og í dag gerum við ráð fyrir að umsvifin í vetur verði mjög lítil á Keflavíkurflugvelli. Það er því útlit fyrir að verkefni verði af skornum skammti fyrir hóp starfsmanna okkar næstu mánuðina.“

Veruleg óvissa ríki um framvindu næstu mánaða og segir Sveinbjörn Isavia munu endurskoða stöðuna reglulega. Breytist ástandið til batnaðar þá geti fyrirtækið brugðist hratt við.

„Við óskum öllu því fólki sem nú er að hverfa frá Isavia velfarnaðar, þökkum því fyrir þeirra störf og vonumst til að leiðir okkar liggi saman á ný fyrr en síðar,“ er haft eftir Sveinbirni.

Fréttin hefur verið uppfærð.