Athugið þessi frétt er meira en 1 ára gömul.

Bíræfnir þjófar stálu tveimur tonnum af rækjum

24.08.2020 - 14:47
Mynd með færslu
 Mynd: Jóhannes Jónsson - RÚV
Lögreglan á Norðurlandi vestra rannsakar býsna bíræfinn þjófnað en tveimur tonnum af rækjum var stolið frá einni elstu rækjuverksmiðju landsins, Meleyri á Hvammstanga, um helgina.

Baldvin Þór Bergþórsson, verkefnisstjóri rækjuvinnslunnar, segir í samtali við fréttastofu að upp hafi komist um þjófnaðinn á laugardagsmorgun. Lás hafi verið brotinn á frystigámi og rækjurnar horfnar. 

Hann áætlar að „götuvirði“ rækjanna sé í kringum 5 til 6 milljónir. „Þetta er svolítið mikið,“ segir Baldvin.

Þjófarnir hafa þurft að vera ansi skipulagðir og vel á sig komnir enda eru rækjurnar pakkaðar í tíu kílóa kassa. Þetta voru því um 200 kassar sem þeir stálu og þurftu að ferja yfir í bíl.  „Það verður ekki auðvelt að koma þessu í verð.“

Stefán Vagn Stefánsson, yfirlögregluþjónn hjá lögreglunni á Norðurlandi vestra, staðfestir í samtali við fréttastofu að rækju-þjófnaðurinn sé til rannsóknar. Hann segir augljóst að þjófarnir hafi þurft sérstakt ökutæki til að flytja rækjurnar enda komist svona magn ekki fyrir í venjulegum fjölskyldubíl.

Verið sé að fara yfir myndefni úr eftirlitsmyndavélum, ekki bara frá hafnarsvæðinu. Hann bendir á að væntanlega þurfi þjófarnir að koma vörunni fyrir í frystigeymslu og biðlar til fólks um að hafa varann á sér ef því býðst að kaupa rækjur á vægu verði.

freyrgigja's picture
Freyr Gígja Gunnarsson
Fréttastofa RÚV