Athugið þessi frétt er meira en 10 mánaða gömul.

Verða fyrir líkamsárásum vegna kynhneigðar

Mynd með færslu
 Mynd: RÚV
Hinsegin ungmenni hafa mátt þola líkamsárásir í skólanum vegna kynhneigðar sinnar og þriðjungur þeirra upplifir óöryggi. Þörf er á öflugri hinsegin fræðslu í skólum landsins, segir fræðslustýra Samtakanna 78.

Þetta er niðurstaða könnunar sem Samtökin 78 kynntu í gær en þetta er í fyrsta sinn sem líðan hinsegin ungmenna í grunn- og framhaldsskólum á Íslandi er könnuð sérstaklega. 181 nemandi á aldrinum 13 til 20 ára svaraði könnuninni sem var gerð skólaárin 2016 og 2017.

Áreiti algengt

Könnunin leiðir meðal annars í ljós að einn af hverjum þremur varð fyrir munnlegri áreitni vegna kynhneigðar sinnar á því skólaári, 12,6 prósent urðu fyrir líkamlegri áreitni og einn af hverjum 12 mátti þola líkamsárás á undangengnu skólaári, gagngert vegna kynhneigðar.

Vilja fræðslu í fleiri sveitarfélög

Tótla Sæmundsdóttir, fræðslustýra Samtakanna 78, segir niðurstöðurnar sýna að hinsegin ungmenni finni fyrir óöryggi í skólanum. „Við viljum náttúrlega gera miklu betur. Ég held að fyrsta skrefið sé fræðsla.“

Samtökin 78 hafa samið við Reykjavíkurborg og Hafnarfjarðarbæ um hinsegin fræðslu í skólum en meira þarf til. „Við viljum náttúrlega sjá samninga við sem flest sveitarfélög. Það væri draumurinn, að við gætum komið inn í sem flesta skóla og þetta sé ekki í rauninni val hvers skóla fyrir sig hvort það sé hinsegin fræðsla.“

 

Magnús Geir Eyjólfsson