Yfir fimm milljónir kórónaveirusmita í Bandaríkjunum

09.08.2020 - 06:30
epa08590776 People wait in line outside of DC Fire and EMS Station 10 for a coronavirus test in Washington, DC, USA, 07 August 2020. The DC government has opened at least 13 walk-up or drive-thru testing sites, 5 of them free, for city residents who are experiencing covid symptoms or have come into contact with someone who has tested positive.  EPA-EFE/SAMUEL CORUM
Fólk í biðröð eftir kórónaveiruprófi í höfuðborg Bandaríkjanna, Washington DC. Mynd: EPA-EFE - EPA
Kórónaveirusmit í Bandaríkjunum eru nú orðin fleiri en fimm milljónir talsins, samkvæmt samantekt Reuters-fréttastofunnar, og dauðsföll af völdum COVID-19 eru ríflega 162.000 þar í landi. Fyrr í gærkvöld bárust fréttir af því að staðfest smit í Brasilíu væru komin yfir þrjár milljónir og að fleiri en eitt hundrað þúsund manns hefðu dáið úr sjúkdómnum þar. Á Nýja Sjálandi var því aftur á móti fagnað nú í morgunsárið að þar hefur ekki greinst nýtt samfélagssmit í 100 daga.

Samtals hafa nú rúmlega 19,6 milljónir manna smitast af kórónaveirunni sem veldur COVID-19, samkvæmt tölum Johns Hopkins háskólans bandaríska. Um 725.000 manns hafa dáið úr sjúkdómnum en næstum í tólf milljónir náð heilsu á ný. Vestanhafs geisar farsóttin enn af miklum þunga, einkum í Bandaríkjunum, Brasilíu og Mexíkó, sem eru þau þrjú ríki þar sem flestir hafa týnt lífi.

Sjá einnig: Brasilía: Yfir 100.000 dauðsföll og 3 milljónir smita 

En sóttin sækir víðar í sig veðrið því á Indlandi eru staðfest smit orðin 2,15 milljónir. Þar breiðist veiran hratt út; yfir 60.000 tilfelli greinast þar á degi hverjum.

Og í Evrópu, þar sem mesti kúfurinn virtist hafa gengið yfir fyrir skemmstu er veiran nú aftur í sókn, þótt ástandinu þar verði á engan hátt líkt við það sem það var þegar verst lét eða ástandið í Vesturálfum nú.

Ævar Örn Jósepsson
Fréttastofa RÚV
Síðast:
Þessi þáttur er í hlaðvarpi