Mynd: Guðmundur Bergkvist - RÚV
Athugið þessi frétt er meira en mánaðargömul.
Mun valda töluverðu tjóni
Jóhannes Þór Skúlason, framkvæmdastjóri Samtaka ferðaþjónustunnar, segir vissulega ákveðin vonbrigði að Íslendingar hafi ekki náð að komast lengra inn í haustið áður en þurfti að grípa til harðari aðgerða. „Við höfðum svo sem ekki gert okkur neinar vonir um að til þess myndi ekki koma, en það eru vissulega vonbrigði að það gerist svona hratt,“ segir Jóhannes.
Segist Jóhannes treysta ferðaþjónustunni fullkomlega til að bregðast við hertum samkomutakmörkunum. „Ferðaþjónustan er búin að vera í framlínunni í þessum bardaga síðan snemma í vor og við þekkjum vel hvað við þurfum að gera. Það er þó ljóst að þetta setur töluvert strik í reikninginn og býr til töluverð vandamál sem þarf að takast þá aftur á við.“
Að mati Jóhannesar munu hertar aðgerðir nú ekki hvað síst hafa áhrif á veitingahúsa- og hótelrekstur, þessa jafnan stærstu ferðahelgi ársins.
„Það er ljóst að veitingahús munu þurfa að takmarka aðgengi þannig að ég vonast til að fólk sýni nú tillitsemi og skilning á aðstæðum þar. Það munu allir gera sitt besta og við vitum það frá því í vor að framlínufólkið okkar í ferðaþjónustunni það hefur tekið þessu með mikilli alvöru og er að reyna gera sitt besta og mun gera það áfram.“
Engu að síður sé ljóst að þetta muni valda töluverðu tjóni.
