Hefði viljað harðari aðgerðir - ástandið skuggalegt

30.07.2020 - 12:50
Mynd með færslu
Kári Stefánsson, forstjóri Íslenskrar erfðagreiningar. Mynd: Freyr Arnarson - RÚV
Kári Stefánsson, forstjóri Íslenskrar erfðagreiningar, segir að ástandið vegna kórónuveirufaraldursins sé svolítið skuggalegt. Sjö aðilar út í samfélaginu séu smitaðir af veiru með sama stökkbreytingamynstrið en hafi ekki nein tengsl. Sá möguleiki sé því fyrir hendi að veira sé komin út um allt. „Minn kvíði er af þeirri gerð að ég hefði viljað enn harðari aðgerðir.“

10 ný innanlandssmit greindust í gær og er fjöldi virkra smita nú 39.  Stór hópsýking er á suðvesturhorni landsins með alls 24 einstaklingum.

Kári Stefánsson, forstjóri Íslenskrar erfðagreiningar, segir að fyrirtækið sé komið á fullt í að skima fyrir veirunni. 

Hann viðurkennir að hann hefði viljað sjá harðari aðgerðir kynntar í morgun, að samkomubannið yrði bundið við 20 og að vínveitingastöðum yrði lokað. „Ástandið er svolítið skuggalegt því það eru sjö aðilar sem eru smitaðir af veiru með sama stökkbreytingamynstrið sem hafa ekki nein sýnileg tengsl. Sá möguleiki er því fyrir hendi að veiran sé komin út um allt.“

Kári segir að best sé að grípa hratt inn í og það sé öruggt að það beri árangur.  „Það eru smitaðir út í samfélaginu sem þarf að ná til.“

Hann bendir jafnframt á að bæði landlæknir og sóttvarnalæknir hafi sagt að það verði stigið fastar niður ef þessar aðgerðir sem kynntar voru í morgun beri ekki árangur.

freyrgigja's picture
Freyr Gígja Gunnarsson
Fréttastofa RÚV
Síðast:
Þessi þáttur er í hlaðvarpi