Athugið þessi frétt er meira en 12 mánaða gömul.

Sjálfstæðisyfirlýsing afturkölluð

epa06999447 Yemeni female activist Haifa Subay holds a pro-peace placard during a campaign calling for peace in the war-torn country, in the old quarter of Sana'a, Yemen, 05 September 2018. Yemeni activist and artist Haifa Subay, 27, has launched a &
 Mynd: EPA-EFE - EPA
Umbreytingarráð suðursins, aðskilnaðarsinnar sem vilja aukið sjálfræði fyrir suðurhluta Jemens, hefur afturkallað sjálfstæðisyfirlýsingu sína frá því í apríl síðastliðnum.

Þetta kemur fram í Twitter-færslu Nizar Haitham talsmanns ráðsins. Nú er kallað eftir að Ryadh samkomulagið frá því í nóvember verði endurvakið, til að koma á öryggi og stöðugleika á svæðinu.

Jafnframt eigi ákvörðunin að tryggja samstöðu gegn Hútí-fylkingunni og öðrum hryðjuverkahópum. Jafnframt sé ætlunin að mynda ríkisstjórn, skipa landsstjóra og öryggisstjóra fyrir borgina Aden. 

Þrýstingur frá stjórnvöldum í Sádi-Arabíu og Sameinuðu arabísku furstadæmunum varð til þess að Umbreytingarráðið tók þessa ákvörðun.  

Ryadh samkomulagið inniheldur 29 skilmála milli ríkisstjórnar Jemens og Umbreytingarráðsins sem eiga að festa mikilvæga þætti í stjórnun suðurhluta landsins í sessi.

Borgarastyrjöld hefur geisað í Jemen frá árinu 2015 þar sem Hútí-fylkingin og aðrir hópar sem studdu Ali Abdullah Saleh fyrrum forseta landsins og stuðningshópar núverandi forseta, Abdrabbuh Mansur Hadi takast á. Borgin Aden er höfuðvígi þeirra.