Mynd: EPA-EFE - EPA
Athugið þessi frétt er meira en mánaðargömul.
Najib sakfelldur fyrir fjársvik og peningaþvætti
Najib Razak, fyrrverandi forsætis- og fjármálaráðherra Malasíu, var í morgun fundinn sekur um öll sjö brot sem hann var ákærður fyrir í fyrstu réttarhöldunum yfir honum vegna milljarða fjársvikamáls. Málið er kennt við opinbera fjárfestingasjóðinn 1MDB og teygir anga sína til fjölmargra landa. Meðal sakarefna eru misnotkun á almannafé, peningaþvætti og misnotkun valds.
Najib hefur jafnan neitað allri sök í málinu, sem olli miklu pólitísku hneyksli í landinu og felldi ríkisstjórn Umno-flokksins sem þá hafði farið með völdin í Malasíu í rúm 60 ár.
Yfirlýst markmið sjóðsins, sem var stofnaður 2009, var að styrkja efnahag Malasíu og auka velferð malasísku þjóðarinnar. Talið er að jafnvirði 560 milljarða íslenskra króna hafi horfið úr sjóðnum með ólögmætum hætti. Þar af er Najib talinn hafa dregið sér allt að 67 milljarða í eigin sjóði.
