21 staðfest smit hér á landi

27.07.2020 - 10:43
Víðir Reynisson í fréttum 23. júlí 2020
 Mynd: RÚV
Tuttugu og einn eru í einangrun hér á landi með virkt COVID-19 smit. Þetta kemur fram í tilkynningu frá almannavarnadeild ríkislögreglustjóra og embætti landlæknis. Smitin hafa greinst frá 8. júlí síðastliðnum. 173 eru í sóttkví.

Í tilkynningunni kemur fram að þeir smituðu hafi sýnt einkenni COVID-19 en enginn sé alvarlega veikur eða á sjúkrahúsi. Um ellefu aðskilin mál sé að ræða og í tveimur þeirra hafi uppruni smita ekki fengist staðfestur. Íslensk erfðagreining raðgreinir sýni til þess að leita að uppruna þeirra.

Af þessu tuttugu og eina smiti eru tíu innanlandssmit og sjö þeirra tengjast manninum sem kom til landsins 15. júlí og áttaði sig ekki á því að hann ætti að gæta sín og fara aftur í próf eftir að hafa greinst neikvæður á landamærunum. Í gær voru greind 18 innanlandssýni og sex þeirra reyndust jákvæð.

Almannavarnadeild ríkislögreglustjóra og embætti landlæknis minna almenning á að halda sig heima þar til neikvæð niðurstaða hefur borist úr sýnatöku.

Almannavarnadeild og landlæknir minna á sóttvarnir og smitgát

Þá er ítrekað í tilkynningunni að einkenni COVID-sýkingar minni á venjulega flensu með hita, hósta, bein- og vöðvaverkjum, þreytu og jafnvel meltingareinkennum og breyttu bragð- eða lyktarskyni. Sýni einstaklingur einkenni eða vakni grunur um smit í nærumhverfi skuli halda sig heima og hafa samband við heilsugæslu eða netspjall á heilsuvera.is. Einnig megi hafa samband við Læknavaktina í síma 1700.

Þá minna almannavarnir og landlæknir á mikilvægi þess að fólk sæki Rakning C-19 appið í síma sína. 

hildurmj's picture
Hildur Margrét Jóhannsdóttir
Fréttastofa RÚV
Síðast:
Þessi þáttur er í hlaðvarpi