Athugið þessi frétt er meira en mánaðargömul.

Framtíðarsamningar við Bretland í farvatninu

22.07.2020 - 19:36
epa07586803 (L-R) secretary general of the European Free Trade Association (EFTA) Henri Getaz, Norway Foreign Minister Ine Marie Eriksen Soreide, Minister for Foreign Affairs of Liechtenstein Aurelia Frick, Iceland Foreign Minister Gudlaugur Thor Thordarson and Romanian Minister for Business and Trade Stefan Radu Oprea pose ahead of the European Economic Area council in Brussels, Belgium, 20 May 2019. EPA-EFE/OLIVIER HOSLET
 Mynd: EPA-EFE - EPA
Á fundi á föstudag komu aðalsamningamenn EES/EFTA ríkjanna og Bretlands sér saman um sameiginlegt umboð um málefnalista sem vilji er til þess að ná samkomulagi um. Fundurinn var annar fundur aðalsamningamanna EES/EFTA ríkjanna og Bretlands og var fjarfundur.

Málefnin sem áhersla verður lögð á að ná samkomulagi um eru þessi: fríverslunarsamningar, samhæfing almannatryggingakerfa, loftferðar- og flugöryggismál, lögreglusamstarf, för fólks og búseturéttindi, menntamál, rannsóknir og nýsköpun, og samstarf á sviði einkamála.

 „Með þessu samkomulagi er skýr rammi settur utan um framtíðarviðræður okkar við Bretland. Ég er ánægður með að öll þau mál sem ég hef sett í forgrunn vegna útgöngu Bretlands úr EES samningnum eru hér á lista og kappkostað verður að ná farsælli niðurstöðu hvað þau varðar,“ sagði Guðlaugur Þór Þórðarson, utanríkis- og þróunarsamvinnuráðherra, af tilefninu.

Að sögn Þóris Ibsen aðalsamningamanns Íslands er þessi málefnalisti afrakstur fjölda óformlega funda samningsaðila og nær utan um öll þau mál sem liggja til grundvallar samningsmarkmiðum Íslands, sem samþykkt voru af ríkisstjórn í janúar.

Haldið opnu að semja sérstaklega um mál háð EES samningum

„Flest þeirra falla undir fríverslunarviðræðurnar, sem munu ná bæði til vöru- og þjónustuviðskipta. Í umboðinu er því haldið opnu að semja sérstaklega um þau mál sem háð eru EES samningnum, náist ekki samningar á milli Bretlands og ESB fyrir áramót,“ segir Þórir.

Dominic Raab, utanríkisráðherra Breta, segir samkomulagið vera 66 milljarða punda virði og að ríkur vilji sé til að halda samningaviðræðum til streitu.