Athugið þessi frétt er meira en 8 mánaða gömul.

Herjólfsverkfalli aflýst

20.07.2020 - 19:46
Mynd með færslu
 Mynd: Þórdís Arnljótsdóttir - RÚV
Sjómannafélag Íslands hefur  aflýst vinnustöðvun undirmanna um borð í Herjólfi sem hefjast átti á miðnætti í kvöld. Samkomulag hefur náðst á milli deiluaðila um viðræðuáætlun og á viðræðum að vera lokið fyrir 17. ágúst.

Þetta kemur fram í tilkynningu frá Bergi Þorkelssyni, formanni Sjómannafélags Íslands.

 Í viðræðuáætluninni felst meðal annars að skoða forsendur starfsaldurshækkana og vinnutímastyttingu á forsendum Lífskjarasamningsins, klára starfslýsingu þerna og háseta, skoða forsendur launahækkunar miðað við Lífskjarasamninginn með sérfræðingum og koma á hvíldarákvæðum í samræmi við alþjóðalög.

Boðað hafði verið þriggja sólarhringa verkfall undirmanna um borð í Herjólfi sem eru í Sjómannafélagi Íslands. Það hefði verið þriðja vinnustöðvunin á  jafnmörgum vikum, en sú fyrsta stóð í einn sólarhring og sú næsta í tvo.