Funda ennþá stíft hjá sáttasemjara

18.07.2020 - 21:54
Mynd með færslu
 Mynd: Kristín Sigurðardóttir - RÚV
Samninganefndir Icelandair og Flugfreyjufélags Íslands sitja enn á fundi og er Bogi Nils Bogason, forstjóri Icelandair, meðal þeirra sem fundinn sitja. 

Ríkissáttasemjari boðaði samninganefndirnar á fund síðdegis í dag. Ingvar Þór Björnsson fréttamaður hefur verið við hús ríkissáttasemjara í kvöld. Hann sagði á tíunda tímanum í kvöld enga hreyfingu vera á fundarmönnum.

Fram kom í kvöldfréttum að leynd hvíli yfir viðræðunum. Fréttastofa hefur hefur þó heimildir fyrir því að eitthvað nýtt hafi verið lagt á borðið og því hafi ríkissáttasemjari boðað til fundarins.

Stjórnendur Icelandair tilkynntu í gær að þeir hefðu slitið viðræðum við Flugfreyjufélag Íslands um nýjan kjarasamning, og sagt upp öllum flugfreyjum og flugþjónum. Jafnframt sögðust þeir ætla að ganga frá kjarasamningi við annan viðsemjanda en Flugfreyjufélagið.

Forsvarsmenn Flugfreyjufélagsins og fleiri stéttarfélaga brugðust ókvæða við tilkynningu Icelandair. Ákváðu stjórn og trúnaðarráð Flugfreyjufélagsins að boða til atkvæðagreiðslu um allsherjarvinnustöðvun hjá Icelandair.

Anna Sigríður Einarsdóttir
Síðast:
Þessi þáttur er í hlaðvarpi