Icelandair flytur strandaglópa til og frá Bandaríkjunum

09.07.2020 - 12:55
Mynd með færslu
 Mynd: Bjarni Rúnarsson - RÚV
Icelandair mun á næstunni flytja á annað þúsund armenskra og bandarískra ríkisborgara á milli Los Angeles í Kaliforníu og Jerevan í Armeníu. Farþegarnir hafa verið strandaglópar vegna COVID-19 faraldursins, en fá nú að snúa til síns heima. Fjöldi ferða liggur ekki fyrir, en um er að ræða á annað þúsund farþega.

Í tilkynningu frá Icelandair segir að um sé að ræða sérverkefni á vegum Loftleiða Icelandic sem unnið er í samvinnu við stjórnvöld í Armeníu, flutningafyrirtækið Cross Line og kjörræðismann Íslands í Armeníu. Einnig hefur íslenska utanríkisþjónustan aðstoðað við tilurð verkefnisins.

Um milljón manns af armenskum uppruna búa í og við Los Angeles. Boeing-767 vélar Icelandair verða nýttar í verkefnið en þær taka um 260 farþega. Flogið er um Ísland sem liggur nokkurn veginn um miðja vegu milli Kaliforníu og Armeníu og fyrsta flugið fer frá Los Angeles laugardaginn 11. júlí og fyrsta flug frá Yerevan fer mánudaginn 13. júlí.

Þjónustan um borð verður í samræmi við núverandi verklagsreglur Icelandair samkvæmt tilkynningunni. Í hverri áhöfn verða 9-12 manns;  2-3 flugmenn, sex flugfreyjur og -þjónar og einn flugvirki.

Í tilkynningunni er haft eftir Boga Nils Bogasyni forstjóra Icelandair Group að með þessu hafi starfsfólk Loftleiða Icelandic, í samstarfi við ýmsar deildir samstæðunnar, sýnt mikla útsjónarsemi þegar kemur að sérverkefnum í leiguflugi. Flugferðirnar séu kærkomin viðbót við fraktflug frá Kína til Evrópu og Norður-Ameríku sem Icelandair Group hefur sinnt á undanförnum vikum.

„Verkefni sem þessi færa félaginu auknar tekjur og skapa störf fyrir starfsfólk þar sem undirbúningur og skipulag fer fram hér á landi. Þetta er gott dæmi um þann sveigjanleika sem Icelandair Group og dótturfélög þess búa yfir til að taka að sér verkefni sem þessi með skömmum fyrirvara,“ segir Bogi Nils í tilkynningunni.

 

annalth's picture
Anna Lilja Þórisdóttir
Síðast:
Þessi þáttur er í hlaðvarpi