35 þúsund Íslendingar nota ekki bílbelti

Mynd: Rúnar Snær Reynisson / RÚV
Þrjátíu og fimm þúsund Íslendingar eða tíu prósent þjóðarinnar nota ekki bílbelti að staðaldri. Einar Magnús Magnússon, sérfræðingur í öryggis- og fræðsludeild Samgöngustofu, segir þetta áhyggjuefni einkum í ljósi þess að tveir þriðju þeirra sem létust í bílslysum í fyrra voru ekki í öryggisbelti. 

Rætt var við hann í Morgunútvarpi Rásar 2. „Þetta er vægast sagt mjög mikið áhyggjuefni vegna þess að t.d. bara á síðasta ári þá voru tveir af þeim þremur sem létust í bifreið, þeir voru ekki í öryggisbeltum. Þá sjáum við hvað þeir sem ekki voru ekki í öryggisbeltum eru í margfalt meiri lífshættu en aðrir,“ segir Einar.

Hann slær á fullyrðingar um að fólk kunni að vera öruggara í bíl án beltis og segir þær stangast á við allar rannsóknir.

„Þær leiða það allar í ljós að þú ert aldrei öruggari án öryggisbeltis,“ segir Einar. 

Þá hafi orðið alvarleg slys þegar fólk hafi ekið um stuttan veg á fimmtíu kílómetra hraða án beltis. Ekki sé ekki síður mikilvægt að nota bílbeltið í aftursæti.

„Það skiptir engu máli hvar þú ert í bílnum. Höggþunginn verður alls staðar sá sami inni í bílnum og hættan er alveg sú sama, hvort sem þú situr frammi í eða aftur í. Fyrir utan þetta mikilvæga atriði sem við erum alltaf að reyna að gera fólki grein fyrir: Segjum að það séu fjórir í bíl, allir eru í öryggisbeltum nema einn. Þessi eini er eins og dauðans pendúll sem kastast til inni í bílnum. Höggþunginn er svo ofboðslegur. Líkamsþyngd manns tugfaldast við árekstur eða bílveltu. Menn geta orðið eins og afríkufíll við svona aðstæður. Þá ertu ekki bara að skaða sjálfan þig heldur líka þá sem samviskusamlega settu á sig belti. Það eru aldrei þær aðstæður að það sé betra að vera án beltis,“ segir Einar.

kristins's picture
Kristín Sigurðardóttir
Fréttastofa RÚV
Síðast:
Þessi þáttur er í hlaðvarpi