Mynd: Gunnlaugur Starri - RÚV
Athugið þessi frétt er meira en 10 mánaða gömul.
Grasfrjó flest í Garðabæ og mest af birkifrjóum nyrðra
Svipaður fjöldi frjókorna mældist í lofti á Akureyri í júnímánuði og í sama mánuði undanfarin ár. Í Garðabæ mældust aftur á móti um tvöfalt fleiri frjókorn en að meðaltali í júní. Á Akureyri voru birkifrjó sú tegund frjókorna sem mældist mest af en í Garðabæ mældist mest af grasfrjóum.
Þetta kemur fram í tilkynningu frá Náttúrufræðistofnun Íslands.
Þar segir að á Akureyri hafi að meðaltali mælst 674 frjó/m3, sem er nokkuð nálægt meðaltali fyrri ára, og að þau hafi verið samfellt í lofti allan mánuðinn. Í Garðabæ mældust 2.479 frjó/m3 sem er talsvert yfir meðaltali júnímánaðar.
3. júní var sá dagur mánaðarins sem flest frjókorn mældust á Akureyri og í Garðabæ mældust flest frjókorn 21. júní.
