Börnin vilja reykherbergi og stærri rennibraut

Mynd: hallaharðar / hallaharðar

Börnin vilja reykherbergi og stærri rennibraut

08.07.2020 - 15:05

Höfundar

Reykjavíkurborg hefur efnt til opinnar hönnunarsamkeppni um nýjan leikskóla og fjölskyldumiðstöðvar við enda Njálsgötu, þar sem Njálsgöturóló hefur verið um árabil. Nýja byggingin er hluti af verkefninu „Brúum bilið“ sem miðar að því að fjölga leikskólaplássum fyrir yngri börn og brúa bilið á milli fæðingarorlofs og leikskóla. 

Þegar ljóst var að nýtt húsnæði væri fyrirhugað ákváðu stjórnendur gömlu Njálsborgar að efna til hugmyndasamkeppni þar sem börnin í skólanum fengju að viðra sínar skoðanir og láta ljós sitt skína sem hönnuðir. 

„Þetta er svona skúr fyrir starfsfólkið, og hér eru tröppur fyrir Magdalenu sem býr til matinn í leikskólanum. Hér er svo turn með leynidyrum fyrir bréf,“ segir Óttar Benedikt Davíðsson og bendir einnig á tilraunastöð, gróðurhús og PlayStation-herbergi. Óttar, Jóakim, Trang og Lucy eru meðal þeirra barna sem tóku þátt í hönnunarsamkeppni Njálsborgar um nýjan leikskóla. Börnin segja einnig mikilvægt að í nýja leikskólanum verði vatnsrennibraut og margir hundar.

Kristín R. Einarsdóttir leikskólastjóri segir ýmislegt hafa komið á óvart við úrlausnir barnanna. „Gróðurhúsið kom mér á óvart. Og annað sem kom okkur að óvörum var að þau vildu reykherbergi fyrir fullorðna, en samt reykir enginn af starfsmönnum deildarinnar. Og svo þessi sterka krafa um vatnsrennibraut,“ segir Kristín allsendis óviss um það hvort arkitektarnir verði við óskum barnanna. „Ég veit ekkert um það en ég vona að það verði stór rennibraut.“

Tengdar fréttir

Menningarefni

Glaðasti hundur í heimi býður hundum í afmæli