Mynd: RÚV
Athugið þessi frétt er meira en 1 ára gömul.
Önnur akreinin á Vesturlandsvegi malbikuð í dag
Búast má við talsverðum töfum á umferð á Vesturlandsvegi í dag þar sem Vegagerðin heldur áfram malbikunarvinnu á veginum norðan Grundarhverfis. Vegurinn verður þrengdur um eina akrein og umferð handstýrt líkt og í gær. Í gær gátu liðið um tuttugu mínútur á milli þess sem skipt var um aksturstefnu.
Áætlað er að framkvæmdir standi til ellefu í kvöld. Í dag er einnig stefnt að því að malbika tvo beygjurampa, frá Vesturlandsvegi og annars vegar upp á Höfðabakka, hins vegar upp á Suðurlandsveg.
Löng röð bíla myndaðist í vesturátt á Kjalarnesi í gær. Vegfarandi sem var kominn í gegnum Grundahverfið hafði beðið í langri bílaröð í tæpa klukkustund.
Mánudaginn 6. júlí og þriðjudaginn 7. júlí er unnið að malbikun á Vesturlandsvegi (1) rétt norðan Grundarhverfis. Þrengt verður um eina akrein og umferð handstýrt. Búast má við umferðartöfum. Áætlað er að framkvæmdirnar standi frá kl. 08:30 til kl. 23:00, báða dagana. #vegavinna
— Vegagerðin | Iceland Roads (@Vegagerdin) July 7, 2020
Kaflinn sem verið er að malbika aftur er frá Grundarhverfi á Kjalarnesi og vestur að brúnni yfir Blikdalsá.
