Athugið þessi frétt er meira en 1 ára gömul.

Kólumbusi steypt af stalli og hent í höfnina

05.07.2020 - 08:45
Stytta af Kristófer Kólumbus í Baltimore.
 Mynd: Flickr
Mótmælendur í borginni Baltimore í Bandaríkjunum steyptu í nótt styttu af landkönnuðinum Kristófer Kólumbus af stalli. Fólkið batt reipi um styttuna, dró hana niður og fór með hana að höfninni þar sem henni var varpað í sjóinn.

Þetta er ekki fyrsta styttan af ítalska landkönnuðinum sem verður fyrir barðinu á mótmælendum, en nú líta margir svo á að hann hafi á sinni tíð verið helsti hvatamaður þjóðarmorðs á frumbyggjum Ameríku. Lítil en nokkuð umdeild stytta af honum var í síðasta mánuði gerð höfðinu styttri þar sem hún stóð á stalli sínum í norðurhluta Boston.

Þá var stytta af Kólumbusi, sem staðið hafði í San Fransisco, tekin niður fyrir nokkrum vikum vegna þess að gjörðir hans ættu það ekki skilið að vera hafðar í hávegum.

Undanfarið hafa fjölmargar styttur og minnismerki, bæði í Bandaríkjunum og annars staðar í heiminum, verið skemmd eða þeim steypt niður. Það er hluti mótmæla sem verið hafa víða um heim eftir að George Floyd var drepin af lögreglumanni í Minneapolis 25. maí. í kjölfarið hefur ofbeldi lögreglu í garð svarts fólks verið mótmælt, sem og kerfisbundnu kynþáttahatri í Bandaríkjunum. 

Segir öfgafulla vinstri menn ráðast að sögu landsins

Í ávarpi, sem hann hélt í fyrradag í tilefni af þjóðhátíðardegi Bandaríkjanna sem var í gær, lagði Donald Trump Bandaríkjaforseti til að opna garð með minnismerkjum um merkustu einstaklingana í sögu Bandaríkjanna. Þar fór hann mikinn um kröfur mótmælenda um að fella styttur og minnismerki víða um landið og sagði bandaríska sögu liggja undir árásum öfgafullra vinstri sinnaðra fasista.