Arnarunginn sem handsamaður var af lögreglunni á Vestfjörðum. Mynd: Lögreglan á Vestfjörðum - Facebook
Athugið þessi frétt er meira en 1 ára gömul.
Lögregla handtók arnarunga
„Það eru ýmsir, sem hafa lent í löngum armi lögreglunnar. Þessi var handsamaður fyrr í kvöld eftir ábendingu um að eitthvað væri óeðlilegt í hegðun hans.“ Svona hefst facebook-færsla lögreglunnar á Vestfjörðum. Færslunni fylgir mynd af fugli sem að sögn lögreglu er arnarungi.
„Hann var handsamaður í nágrenni Bolungarvíkur seinnipartinn í gær,“ segir Ingvar Jakobsson, varðstjóri hjá lögreglunni á Ísafirði. „Fólk á ferli sá hann á röltinu, sá að eitthvað var að hrjá hann og að hann gat ekki flogið og hringdi í okkur. Það var auðvelt að ná honum þar sem hann gat ekki flogið. Gönguhraði arnarunga er greinilega lögreglu hagstæður,“ segir Ingvar.
Unganum var komið í umsjá Náttúrustofu Vestfjarða þar sem hann nýtur nú aðhlynningar.
Uppfært klukkan 12:04: Staðfest hefur verið að fuglinn er ungur fálki.
Arnarunginn í góðu yfirlæti.
Mynd: Lögreglan á Vestfjörðum - Facebook
