Athugið þessi frétt er meira en 8 mánaða gömul.

Áframhaldandi gæsluvarðhald vegna brunans

Húsarústir eftir brunan á Bræðraborgarstíg
 Mynd: Sigríður Hagalín Björnsdótt
Karlmaður á sjötugsaldri var úrskurðaður í sjö daga áframhaldandi gæsluvarðhald í morgun í Héraðsdómi Reykjavíkur vegna rannsóknar á bruna á Bræðraborgarstíg á fimmtudaginn í síðustu viku. Var það gert að kröfu lögreglunnar á höfuðborgarsvæðinu á grundvelli almannahagsmuna.

Í tilkynningu frá lögreglu segir að rannsókninni miði vel áfram en ekki sé hægt að gefa frekari upplýsingar að svo stöddu.

Þrír létust í brunanum og þrír voru handteknir vegna brunans, þar af tveir á vettvangi. Tveimur þeirra var fljótlega sleppt. Sá þriðji, karlmaður á sjötugsaldri sem bjó í húsinu, var handtekinn við sendiráð Rússalands í Garðastræti skömmu eftir að eldurinn kom upp. Hann var úrskurðaður í sjö daga gæsluvarðhald daginn eftir brunann og var það nú framlengt í morgun.