Saksóknarar vilja að Andrés prins gefi skýrslu

Andrés prins og Epstein voru vinir og hefur prinsinn verið sakaður um að hafa þrisvar sinnum brotið kynferðislega á stúlku undir lögaldri, skömmu fyrir aldamót, þar á meðal á einkaeyju Epstein í Karabíska hafinu.

Það var fyrrum unnusta barnaníðingsins, Ghislaine Maxwell, sem var handtekin í dag, sem kynnti þá Andrés og Epstein. 

Sjá einnig: Fyrrum kærasta Jeffrey Epstein handtekin af FBI

Audrey Strauss, starfandi saksóknari New York ríkis, greindi frá handtöku Maxwell í dag. Hún er meðal annars sökuð um að hafa hjálpað Epstein að finna stúlkur í viðkvæmri stöðu og fyrir að hafa einnig níðst á stúlkunum. Henni er gefið að sök að hafa unnið sér inn traust stúlknanna og komið þeim í kynni við Epstein. Oft hafi þær verið beðnar um að nudda hann og að í kjölfarið hafi hann níðst á þeim. Maxwell hefur alltaf neitað ásökunum.

Saksóknarinn sagði á blaðamannafundi að alríkislögreglan vilji gjarna ræða við Andrés prins vegna rannsóknarinnar. Hún vildi þó ekki láta neitt uppi um stöðu hans við þessa rannsókn. 

Sjá einnig: Andrés prins, Epstein og viðtalið hörmulega

Árið 2005 var Epstein ákærður fyrir að misnota fjórtán ára stúlku og var dæmdur í átján mánaða fangelsi. Rannsókn hefur leitt í ljós brot hans á hundruðum stúlkna, flestum á aldrinum þrettán til sextán ára. Hann var handtekinn í júlí í fyrra en svipti sig lífi í fangaklefa í ágúst.

Andrés prins hefur neitað öllum ásökunum. Hann sagði sig frá öllum opinberum skyldum við bresku hirðina í fyrra eftir umdeilt sjónvarpsviðtal í breska ríkissjónvarpinu um vinskapinn við Epstein.