Erfitt að benda á eitthvað eitt

30.06.2020 - 08:19
Mynd: Fréttastofa / Fréttastofa
G. Pétur Matthíasson, upplýsingafulltrúi Vegagerðarinnar, segir að leggja þurfi malbik að nýju á Kjalarnesi og á Gullinbrú á Bústaðaveg og að fylgjast þurfi með ástandi malbiks á Bústaðavegi og Reykjanesbraut við Vífilsstaði. Hann var gestur í Morgunútvarpinu á Rás 2 í morgun og sagði þar að allt nýtt malbik væri varhugavert. Erfitt væri að benda á eitthvað eitt í því sambandi.

Í gær sagði forstjóri Vegagerðarinnar að ný klæðning yrði lögð á vegarkafla á Vesturlandsvegi, þar sem tveir létust í umferðarslysi á sunnudaginn. Nýlögð klæðning þar uppfyllti ekki kröfur Vegagerðarinnar. G. Pétur segir að ekki sé fyllilega vitað hvað olli slysinu. 

„Það hreinlega vitum við ekki. Niðurstaðan var að malbikið varð of hált. Ferlarnir við útlögnina virðast  vera réttir hjá verktakanum. Sama má líka segja um framleiðsluna á malbikinu, menn gera þetta ekki blindandi, þeir „testa“ hvað þeir eru að gera. Það er ekki hægt að benda á eitthvað eitt og segja, þetta gerðist,“ sagði G. Pétur.

Hann sagði að á Kjalarnesi hefðu skapast slæmar aðstæður. Viðnám malbiksins yrði minna með auknum hita og við hefði bæst rigning. 

annalth's picture
Anna Lilja Þórisdóttir
Síðast:
Þessi þáttur er í hlaðvarpi