Hálf milljón veirusmitaðra á Indlandi

27.06.2020 - 10:01
epa08505922 An Indian medical staff in protective gear collects a swab sample from the residents of a 'containment zones' in Kajupada area in Mumbai, India, 24 June 2020. According to media reports, the Indian government has eased some coronavirus related restrictions but has said the lockdown will continue until 30 June, in 'containment zones'. The number of confirmed cases of coronavirus in Mumbai crossed 68,000 cases on 23 June.  EPA-EFE/DIVYAKANT SOLANKI
 Mynd: EPA-EFE - EPA
Staðfest kórónuveirusmit á Indlandi eru orðin fleiri en hálf milljón, samkvæmt upplýsingum sem stjórnvöld birtu í dag. Alls greindust 18.500 smit síðastliðinn sólarhring. Þau hafa ekki verið fleiri til þessa.

385 dauðsföll af völdum COVID-19 sjúkdómsins voru tilkynnt á Indlandi síðasta sólarhring. Hann hefur þar með dregið um 15.700 til dauða frá því að farsóttin blossaði upp. Sérfræðingar í smitsjúkdómum áætla að hún nái ekki hámarki fyrr en að nokkrum vikum liðnum. Útlit er að fjöldi veirusmita fari yfir eina milljón fyrir júlílok.

Í Gauhati, höfuðborg Assam-ríkis í norðausturhluta Indlands, var í dag lýst yfir tveggja vikna útgöngubanni vegna þess hve veirusmitum hefur fjölgað þar að undanförnu. Um það bil sjö hundruð ný tilfelli hafa komið þar upp síðastliðna fjóra daga.

Lestarferðir milli landshluta liggja niðri til að hægja á útbreiðslu veirunnar.

Í höfuðborginni, Nýju Delhi, þar sem búa um 25 milljónir, er ástandið verst. Sjúkrahús eru troðfull af alvarlega veiku fólki og heilbrigðisyfirvöld eru sögð reyna sitt ítrasta til að halda kerfinu gangandi. Alls hafa 75 þúsund veirusmit greinst í höfuðborginni til þessa. Búist er við að þau verði orðin hálf milljón eftir mánuð eða svo.

Sjúklingar sem fá ekki inni á sjúkrahúsum fá aðhlynningu á hótelum, í lestarvögnum og jafnvel í sölum sem alla jafna eru notaðir fyrir brúðkaupsveislur. Ofan á þetta bætist að hitinn í Nýju Delhi er yfir fjörutíu stig um þessar mundir.

 

asgeirt's picture
Ásgeir Tómasson
Fréttastofa RÚV
Síðast:
Þessi þáttur er í hlaðvarpi