Athugið þessi frétt er meira en 2 ára gömul.

Fjölskylduþættir fyrir langar bílferðir

Mynd: RÚV / RÚV

Fjölskylduþættir fyrir langar bílferðir

27.06.2020 - 10:39

Höfundar

Sumarið 2020 er sumarið sem Íslendingar ætla að ferðast innanlands, sem kemur ekki til af góðu. Þá er eins gott að krakkarnir hafi eitthvað til að hlusta á. Í hlaðvarpi KrakkaRÚV, „“Hvar erum við núna?“ með Ingibjörgu Fríðu Helgadóttur og Jóhannesi Ólafssyni, er hægt að kynnast landinu enn betur.

Hvar erum við núna eru fjölskylduþættir fyrir ferðalanga í löngum bílferðum um Ísland. „Við byrjum alla þætti á að vita ekki hvar við erum,“ segir Jóhannes. „Við ferðumst allan hringinn í kringum Ísland og stoppum á mismunandi stöðum og heyrum í krökkum frá mismunandi landsvæðum um hvað þeim þykir skemmtilegast að gerast,“ segir Ingibjörg Fríða. „Þannig að það eru ferðaráð í þættinum, það eru þjóðsögur frá svæðinu, það eru bílaleikir, við förum alltaf yfir hvaða sundlaugar eru á hverjum stað fyrir sig og endum svo á spurningakeppni um landsvæðið.“

Þættirnir eru 11 talsins og farið á dýptina í hverju landsvæði. „Í tveimur aukaþáttum er svo farið yfir hálendið og eyjurnar í kringum Ísland. Þannig að þetta er ítarlegt,“ segir Ingibjörg. Þetta eru þættir fyrir alla fjölskylduna og mæla þau ekki með því að hlustað sé á þættina heyrnartólum. „Því þetta er smá samverustund.“

Hægt er að hlaða þáttunum niður á snjalltæki í gegnum hlaðvarpsveitur, þannig að stopult netsamband verði ekki til vandræða, en að auki er hægt að streyma þeim í útvarpsspilara RÚV og á Spotify. Allir þættirnir eru þegar aðgengilegir í helstu veitum og á RÚV.is.