Gítar Kurt Cobain seldur fyrir metfé

Mynd: MTV - Skjáskot

Gítar Kurt Cobain seldur fyrir metfé

21.06.2020 - 06:54

Höfundar

Róbert Jóhannsson

Fréttastofa RÚV

Kassagítarinn sem Kurt Cobain lék á við upptökur á órafmögnuðum tónleikum MTV sjónvarpsstöðvarinnar árið 1993 seldist fyrir sex milljónir bandaríkjadala á uppboði um helgina, jafnvirði um 830 milljóna króna. Upphæðin er sú hæsta sem fengist hefur fyrir gítar á uppboði. Fyrra met var sett í fyrra þegar gítar David Gilmour úr Pink Floyd var seldur fyrir um fjórar milljónir dala.

Kaupandi Martin D-18E gítars Cobains, sem smíðaður var 1959, er Ástrali að nafni Peter Freedman. Hann er eigandi hljóðnemaframleiðandans Rode Microphones.

"RØDE Founder Peter Freedman Secures Kurt Cobain's 'MTV Unplugged' Guitar at Auction, To Be Exhibited Worldwide With All Proceeds Going To Performing Arts" via @rodemics https://t.co/uXO3UQqL3S

— Juliens Auctions (@JuliensAuctions) June 21, 2020

Fleiri munir úr fórum látinna og lifandi tónlistarmanna voru seldar á net-uppboði Julien's Auctions um helgina. Til að mynda gítar sem áður var í eigu Prince, beltissylgja frá Elvis Presley, dagbók sem Jim Morrison hélt í París og kjóll af Madonnu.