Athugið þessi frétt er meira en 11 mánaða gömul.

Ljóst í dag hvort hjúkrunarfræðingar boða verkfall

Mynd með færslu
 Mynd: RÚV
Atkvæðagreiðslu um verkfallsaðgerðir meðal hjúkrunarfræðinga sem starfa hjá ríkinu lýkur á hádegi í dag og er niðurstöðu að vænta fljótlega í kjölfarið. Atkvæðagreiðslan nær til rúmlega 2.500 hjúkrunarfræðinga.

Hjúkrunarfræðingar hafa verið samningslausir frá því í mars í fyrra. Í lok apríl felldu þeir kjarasamning sem gerður hafði verið milli Félags íslenskra hjúkrunarfræðinga og ríkisins. Nokkuð mjótt var á munum en tæplega 46 prósent samþykktu samninginn. Í kjölfarið boðaði félagið til rafrænnar atkvæðagreiðslu um aðgerðir.

Í könnun sem samninganefnd hjúkrunarfræðinga gerði meðal félagsmanna sinna um miðjan síðasta mánuð kom fram að tveir af hverjum þremur eru tilbúnir til að grípa til aðgerða til að knýja fram kjarabætur.

Ótímabundið verkfall hjúkrunarfræðinga hefst að morgni mánudagsins 22. júní náist samningar ekki fyrir þann tíma. Verði af verkfalli hefur það áhrif á allar heilbrigðisstofnanir sem eru í rekstri ríkisins, auk annarra vinnustaða hjúkrunarfræðinga hjá hinu opinbera.