Athugið þessi frétt er meira en 1 ára gömul.

Grunaður um að tengjast hvarfi annarrar stúlku

05.06.2020 - 16:58
epa05936969 (FILE) -  An undated file handout videograb photograph made available by Real Madrid TV showing missing British girl Madeleine McCann, who was allegedy abducted 03 May 2007 from the resort apartment where she was on vacation with her family in
Madeleine McCann. Mynd: EPA - Real Madrid TV
Þýska lögreglan rannsakar nú hvort að karlmaður, sem grunaður er um að hafa myrt bresku stúlkuna Madeleine McCann í Portúgal árið 2007 hafi átt aðild að hvarfi fimm ára stúlku í Þýskalandi átta árum síðar.  

Fjallað er um tengsl málanna í Spiegel, sem segir það hafa verið rannsókn á máli seinni stúlkunnar sem beindi athygli þýsku lögreglunnar að máli Madeleine. 

Sú stúlka hét Inga og var ljóshærð líkt og Madeleine McCann. Hún hvarf í Saxlandi árið 2015. Hvorug þeirra hefur nokkurn tímann fundist.  

Maðurinn, Christian Brückner, á að baki langan sakaferil og hefur meðal annars verið dæmdur fyrir barnaníð. 

Að sögn Spiegel átti hann árið 2013 í samræðum á Skype við annan mann um að hann langaði  til að ræna og nauðga ungri stúlku og að sú stúlka myndi aldrei finnast.

Áður hefur komið fram að Christian B. hafi verið búsettur í Praia da Luz, bænum sem Madeleine hvarf frá er hún var þar í sumarleyfi með foreldrum sínum og er hann meðal annars grunaður um að hafa nauðgað 72 ára bandarískri konu í portúgalska bænum tveimur árum fyrr. 

Christian B. er nú í fangelsi í borginni Kiel vegna dóms sem hann hlaut fyrir fíkniefnabrot.