Mynd: Rúnar Snær Reynisson - RÚV
Athugið þessi frétt er meira en 2 ára gömul.
Álftir gerðu uppreisn gegn dróna
Álftir gerast gjarnan heimakomnar í túnum bænda og éta þar gras og annan gróður. Bændum er mörgum hverjum ekki vel við slíkar gestakomur og reyna að halda þeim fjarri með ýmsum ráðum.
Álftin er friðuð hér á landi og því má ekki skjóta hana. Bændur hafa lengi kallað eftir því að fallið verði frá þeirri friðun, að minnsta kosti þar sem hún veldur tjóni á ræktunarlandi.
Ýmsum aðferðum hefur verið beitt til að halda álftum og gæsum úr ræktarlandi. Ein aðferð er að notast við dróna og reyna að reka þær upp af túninu yfir á önnur svæði. Sú aðferð virðist skila nokkrum árangri, en álftirnar á Bjarnastöðum í Húnavatnshreppi í Austur-Húnavatnssýslu sneru bökum saman á dögunum og lögðu til atlögu við smalann og höfðu hann undir eins og sjá má í meðfylgjandi myndbandi sem Bjarni Kristinsson, bóndi á Bjarnastöðum tók.
Bjarni segir að tjónið á drónanum sé óverulegt en hann hafi sennilega gerst of nærgöngull við álftirnar með þessum afleiðingum. Álfti eru með mikið vænghaf og geta brugðist við ógn með því að ráðast á ógnina.
