Fjórir handteknir við vinnustaðaeftirlit

27.05.2020 - 16:23
Mynd með færslu
 Mynd: Birgir Þór Harðarson
Fjórir karlmenn voru handteknir á byggingasvæði í Garðabæ í gær þegar lögreglan á höfuðborgarsvæðinu var þar við vinnustaðaeftirlit.  Grunur leikur á að mennirnir, sem allir eru erlendir ríkisborgarar, hafa fengið skráningu á grundvelli falsaðra vegabréfa og hafi því ekki tilskilin leyfi til að starfa hér á landi. 

Mennirnir voru því næst færðir á lögreglustöð þar sem þeir voru yfirheyrðir. Lögregla lagði einnig hald á fölsuð vegabréf í húsleit sem hún framkvæmdi í kjölfarið. Er mönnunum nú gert að sæta svokallaðri tilkynningaskyldu, auk þess sem Útlendingastofnun hefur verið tilkynnt um málið. 

Á byggingasvæðinu hafði lögregla aukinheldur afskipti af tveimur öðrum mönnum, sem reyndust vera hælisleitendur, og höfðu því ekki heimild til vinnu. 

Fram kemur í tilkynningu lögreglu að við aðgerðirnar í gær hafi verið notuð ný bifreið lögreglunnar, sem er einkum ætluð fyrir landamæraeftirlit á höfuðborgarsvæðinu og er vel búin tækjum til þess. Þar á meðal tæki til að skoða og sannreyna skilríki.

Anna Sigríður Einarsdóttir
Síðast:
Þessi þáttur er í hlaðvarpi