Veiran hugsanlega veiklaðri en í byrjun faraldurs

25.05.2020 - 14:50
Mynd með færslu
 Mynd: Þórdís Arnljótsdóttir - RÚV
Þeir sem veikst hafa af COVID-19 upp á síðkastið eiga það allir sameiginlegt að hafa ekki orðið alvarlega veikir. Þetta sagði Þórólfur Guðnason sóttvarnarlæknir á síðasta upplýsingafundi Almannavarna og Landlæknis sem haldinn er, í bili að minnsta kosti. Þórólfur sagði að þetta kunni hugsanlega að þýða að veiran hafi veikst eitthvað frá því að hún kom fyrst til landsins í lok febrúar.

Áslaug Arna Sigurbjörnsdóttir dómsmálaráðherra og Svandís Svavarsdóttir heilbrigðisráðherra voru gestir á fundinum. Þær þökkuðu Þórólfi Guðnasyni, Víði Reynissyni og Ölmu Möller, kærlega fyrir störf þeirra á meðan faraldurinn gekk yfir og fékk þríeykið blóm í þakklætisskyni.

Vinnuhópur um opnun landamæra skilar niðurstöðum

Á fundinum kom fram að í dag skikar vinnuhópur um opnun landamæra niðurstöðum sínum til sóttvarnalæknis. Hann fer yfir þær og gerir tillögur til heilbrigðisráðherra sem tekur svo ákvörðun á grundvelli þeirra.

Þórólfur sagðist ekki vita til þess að neinir tvíhliða samningar milli landa um opnun landamæra væru í undirbúningi.

Fullyrðingar um mildari áhrif á börn studdar

Alma Möller landlæknir sagði að pörun á gögnum frá smitrakningarteymi og Íslenskri erfðagreiningu benti til þess að fullyrðingar sóttvarnalæknis um áhrif veirunnar á börn ættu sannarlega við rök að styðjast. Börn veiktust síður, þau veiktust minna og þau smituðu aðra síður. 

 

Jón Hákon Halldórsson
Fréttastofa RÚV
Síðast:
Þessi þáttur er í hlaðvarpi