21% minni afli í apríl en í sama mánuði í fyrra

15.05.2020 - 09:30
Mynd með færslu
 Mynd: Rúnar Snær Reynisson - RÚV
Afli íslenskra fiskiskipa var 89 þúsund tonn í apríl sem er 21% minni afli en í apríl 2019. Þorskafli var álíka og í fyrra en  verulegur samdráttur varð í veiðum á ýsu, ufsa og karfa að því fram kemur í tölum Hagstofunnar. Uppsjávarafli var líka minni, landað magn kolmunna dróst saman um 31%.

3.600 tonnum var landað af grásleppu og rauðmaga í apríl, þar af var tæplega 60% landað á Norðurlandi sem er nokkuð meira en  fyrri ár. Heildarafli á 12 mánaða tímabili frá maí 2019 til apríl 2020 var 966 þúsund tonn sem er 13% minni afli en á sama tímabili ári fyrr.

Verðmæti afla í síðasta mánuði, á föstu verðlagi var 12% minni en í apríl í fyrra að því fram kemur á vef Hagstofunnar. 
 

 

Anna Kristín Jónsdóttir
Fréttastofa RÚV
Síðast:
Þessi þáttur er í hlaðvarpi