Athugið þessi frétt er meira en 1 ára gömul.

Heimildarmynd um Hatara í alþjóðlega dreifingu

Mynd með færslu
 Mynd: Hatari - A Song Called Hate

Heimildarmynd um Hatara í alþjóðlega dreifingu

05.05.2020 - 12:17

Höfundar

A Song Called Hate, heimildarmynd um Eurovision-för Hatara, verður dreift um allan heim af danska framleiðslufyrirtækinu LevelK. Í myndinni er farið í saumana á aðdraganda þátttöku Hatara í Eurovision og fylgst með hvað gerist að tjaldbaki.

Það er bandaríska bransablaðið Variety sem greinir frá því að samningar hafi náðst um dreifinguna en leikstjóri og framleiðandi er Anna Hildur Hildibrandsdóttir. Hún fylgdi hópnum til Ísrael og Palestínu í fyrra ásamt Baldvini Vernharðssyni kvikmyndatökumanni. Frumsýna átti myndina á CPH:DOX heimildarmyndahátíðinni í Kaupmannahöfn í mars en ekki varð af því vegna lokunar landamæra. Ráðgert er að hún verði frumsýnd í haust.

Í tilkynningu frá TATTARRATTAT sem framleiðir myndina í samstarfi við RÚV segir að A Song Called Hate fjalli um listina sem felst í því að taka afstöðu og spyrji auk þess spurninga um hlutverk listarinnar í pólitísku samhengi. „Þetta ferðalag var bæði ögrandi og erfitt. Maður fann vel fyrir spennunni og hættunum sem voru til staðar,“ segir Anna Hildur en þetta er hennar fyrsta heimildarmynd í fullri lengd. „En um leið var gefandi að sjá Hatarahópinn taka afstöðu til mannréttindamála með svona afgerandi hætti og fylgjast með öllu ferlinu sem stóð í raun yfir í sex mánuði.“

Mynd með færslu
 Mynd: Kynningarefni - .
Anna Hildur Hildibrandsdóttir

Iain Forsyth og Jane Pollard sem unnu með Önnu Hildi að verkinu sem yfirframleiðendur eru meðal annars þekkt fyrir mynd sína 20.000 Days On Earth sem fjallar um Nick Cave. Þeim fannst viðfangsefnið ekki síst áhugavert vegna hugmynda um hvaða áhrif listin getur haft. „Við erum alltaf áhugasöm um stærra samhengi sögunnar sem verið er að fást við. Við viljum afhjúpa goðsögnina um hvað þarf til að vera listamaður, hvað það þýðir að búa yfir skapandi hugsun. Listin getur ekki breytt heiminum, en hún getur breytt fólki og fólk getur breytt heiminum.“

Tengdar fréttir

Popptónlist

Kraftmikil vögguvísa Hatara og GDRN