Athugið þessi frétt er meira en 12 mánaða gömul.

Félagsmenn Eflingar samþykktu verkfall frá 5. maí

27.04.2020 - 17:11
Mynd með færslu
 Mynd: Ragnar Visage - RÚV
Félagsmenn Eflingar hjá Kópavogsbæ, Seltjarnarnesi, Mosfellsbæ, Hveragerði og Sveitarfélginu Ölfusi samþykktu verkfallsboðun í atkvæðagreiðslu sem lauk í dag. Þetta kemur fram í fréttatilkynningu frá Eflingu. Verkfallsboðunin var samþykkt með yfirgnæfandi meirihluta atkvæða, en kjörsókn var 65%. Að óbreyttu hefst verkfall á hádegi þriðjudaginn 5. maí. Vinnustöðvunin er ótímabundin.

Í fréttatilkynningu Eflingar segir:

„89% þeirra sem greiddu atkvæði voru samþykkir verkfallsboðum í grunnskólum og 88% voru samþykkir verkfallsboðun á vinnustöðum öðrum en grunnskólum. 6% þeirra sem greiddu atkvæði voru á móti verkfallsboðun bæði í grunnskólum og á öðrum vinnustöðum. Álíka fjöldi tók ekki afstöðu. Samtals greiddu 65% þeirra sem voru á kjörskrá atkvæði.

Sveitarfélögin sem um ræðir eru Seltjarnarnesbær, Kópavogsbær, Mosfellsbæ, Hveragerðisbæ og Sveitarfélagið Ölfus. Krafa félagsmanna Eflingar sem þar starfa er að gerður verði samningur um sambærilegar kjarabætur og þær sem eru í samningum Eflingar við Reykjavíkurborg og Ríkið. Engar kröfur umfram það eru gerðar.

Samninganefnd frestaði verkfallsaðgerðum meðan Kórónaveirufaraldurinn stóð sem hæst en gaf út að gengið yrði til atkvæða á ný um framhald verkfalls eftir páska. Allir félagsmenn Eflingar hjá sveitarfélögunum fimm munu leggja niður störf ótímabundið á hádegi þriðjudaginn 5. maí, sama dag og samkomubann verður rýmkað.“

„Þetta eru magnaðar niðurstöður. Þær sýna ótrúlegt hugrekki, baráttuvilja og samstöðu okkar fólks. Láglaunafólk ætlar að fá viðurkenningu á því að samfélagið kemst ekki af án þeirra. Veirufaraldur eða ekki – Eflingarfólk lætur ekki kúga sig til hlýðni,“ er haft eftir Sólveigu Önnu Jónsdóttur, formanni Eflingar, í tilkynningunni.