Aðgerðapakkinn vonbrigði fyrir öryrkja

Mynd með færslu
 Mynd: Guðmundur Bergkvist - RÚV
„Enn á ný hlutgerist sú staðreynd að fatlað og langveikt fólk er ekki til í huga stjórnvalda,” segir Þuríður Harpa Sigurðardóttir, formaður Öryrkjabandalags Íslands, vegna aðgerðapakka ríkisstjórnarinnar sem kynntur var í gær. 

Þuríður segir að það virðist ekki skipta neinu máli hvaða stjórnmálaflokkar hafi verið við völd hverju sinni. „Hvort sem er í kreppu eða góðæri undanfarinna áratuga, hafa stjórnmálamenn kosið að horfa framhjá fötluðu og langveiku fólki þegar gæðum er skipt. Enginn hópur samfélagsins hefur upplifað jafn hart að eiga ekki tilkall til mannsæmandi lífs. Öryrkjum er gert að lifa í fátækt sem er útilokandi og niðurlægjandi og draga fram lífið á tekjum sem ekki duga til framfærslu,“ segir Þuríður Harpa. 

Það sé því lykilatriði að örorkulífeyrir hækki. Aðeins þannig verði tryggt að öryrkjar og fjölskyldur þeirra geti lifað mannsæmandi lífi. „Í aðgerðapakka ríkisstjórnarinnar sem kynntur var í gær sjást lítil merki þess að ríkisstjórnin muni eftir fötluðu og langveiku fólki. Þess vegna er hann vonbrigði, en þau vonbrigði koma okkur ekki á óvart, þar sem stjórnvöld virðast líta svo á að öryrkjar séu best gleymdir. En við erum hér líka!,“  segir Þuríður. 

Jón Hákon Halldórsson
Fréttastofa RÚV
Síðast:
Þessi þáttur er í hlaðvarpi