Athugið þessi frétt er meira en 1 ára gömul.

Samið á ný við Icelandair um að tryggja millilandaflug

Mynd með færslu
 Mynd:
Samgöngu- og sveitarstjórnarráðuneytið hefur samið að nýju við Icelandair um flug til Evrópu og Bandaríkjanna með það að markmiði að tryggja lágmarks flugsamgöngur til og frá landinu vegna Covid-19 faraldursins. Áfram verður flogið til Boston, London og Stokkhólms til og með 5. maí.

„Millilandaflug gegnir afar mikilvægu öryggishlutverki fyrir íslenska þjóð og þessar flugtengingar eru meðal annars nauðsynlegar til að tryggja að íslenskir ríkisborgarar, sem staddir eru erlendis, geti fundið sér leið heim,“ segir í tilkynningu á vef Stjórnarráðsins.

Icelandair mun fljúga samtals 16 ferðir, 32 flugleggi, til áfangastaðanna þriggja. Flugáætlun er með eftirfarandi hætti með þeim fyrirvara að dagsetningar geta breyst ef þörf krefur:

  • Boston (Logan International – BOS) 16., 18., 23., 25., 30. apríl og 2. maí
  • London (Heathrow – LHR) 19., 22., 24., 26., 29. apríl og 1. og 3. maí
  • Stokkhólmur (Arlanda – ARN) 18. og 25. apríl og 2. maí

Samningurinn tók gildi í dag, miðvikudaginn 15. apríl og gildir til og með 5. maí. Ríkið greiðir að hámarki 100 milljónir krónur vegna samningsins en mögulegar tekjur Icelandair af flugunum munu lækka greiðslur.