Kristalina Georgieva, yfirmaður Alþjóðagjaldeyrissjóðsins. Mynd: EPA-EFE - EPA
Athugið þessi frétt er meira en 2 ára gömul.
AGS fellir niður skuldir fátækra ríkja
Alþjóðagjaldeyrissjóðurinn samþykkti í gær að fella niður skuldir 25 fátækra ríkja til þess að létta á þeim vegna kórónuveirufaraldursins. Kristalina Georgieva, stjórnandi AGS, sagði í yfirlýsingu við það tilefni að þetta gefi ríkjunum tækifæri á að nýta sjóði sína í í þágu heilbrigðiskerfisins og annarra nauðsynja í baráttunni við veiruna.
Ríkin eru öll í Afríku utan Afganistans, Jemens, Nepal og Haítí. Þá skoraði AGS ásamt Alþjóðabankanum á auðugri ríki að hætta að taka við lánagreiðslum frá fátækari ríkjum frá næstu mánaðamótum fram til júní á næsta ári.
Niðurfellingin verður fjármögnuð í gegnum hamfarasjóð AGS. Hann var stofnaður til þess að berjast gegn ebólufaraldrinum í vestanverðri Afríku árið 2015. Um 500 milljónir bandaríkjadala eru í sjóðnum.
