Mynd: EPA-EFE - EPA
Athugið þessi frétt er meira en mánaðargömul.
Stjórnarmyndunarviðræður í Ísrael í hnút
Viðræður tveggja stærstu stjórnmálaflokkanna í Ísrael um myndun þjóðstjórnar virðist við það að fara út um þúfur. Tíminn sem þeir Benny Gantz, formaður Bláhvíta-bandalagsins, og Benjamin Netanyahu, formaður Likud-bandalagsins og forsætisráðherra Ísraels, hafa til viðræðna er að renna út. Flokkarnir kenna hvor öðrum um að allt sé á afturfótunum.
Bláhvíta-bandalagið sendi frá sér yfirlýsingu um að Likud-bandalagið hafi dregið fram gamlar kröfur um ráðningar dómara eftir að flokkarnir höfðu komist að munnlegu samkomulagi. Likud segir á móti að Gantz hafi dregið flokk sinn úr viðræðunum á síðustu stundu.
Viðræðufresturinn rennur út á morgun, mánudag. Forsetinn Reuven Rivlin getur veitt Gantz tveggja vikna frest til viðbótar. Eins getur hann fært Netanyahu stjórnarmyndunarkeflið, en hvorugur flokkanna er með hreinan meirihluta á þingi, og þeir eru einu tveir flokkarnir sem geta myndað tveggja flokka stjórn saman.
Ísraelskir fjölmiðlar gera að því skóna að Netanyahu hafi slitið viðræðunum eftir að kannanir sýndu Likud öruggan siguvegara ef gengið yrði til kosninga aftur. Síðasta árið hafa Ísraelsmenn þrisvar haldið þingkosningar, og sama pattstaðan orðið niðurstaðan eftir þær allar. Svo virtist sem þeir Gantz og Netanyahu ætluðu að sættast á þjóðstjórn vegna kórónuveirufaraldursins, svo einhver starfhæf stjórn yrði við völd til þess að takast á við hana.
