Mynd: Anna Kristjánsdóttir
Athugið þessi frétt er meira en mánaðargömul.
26 skemmtiferðaskip hafa þegar afboðað komu sína
Búið er að afboða komu 26 skemmtiferðaskipa, sem áður höfðu skráð komu sína til Reykjavíkur. Gísli Gíslason, hafnarstjóri Faxaflóahafna, greindi frá þessu í viðtali í síðdegisþætti Bylgjunnar í dag. Fyrsta skip ársins kom til landsins í mars, en koma næsta skips er skráð 21. maí. Óvíst er þó að það komi.
Greint er frá þessu á Vísi.is. Gísli segir að 189 skip hafi verið búin að boða komu sína en 26 hafi þegar afboðað sig og væntir hann þess að fleiri fylgi í kjölfarið. Nánast öll skemmtiferðaskip heims liggi nú bundin við bryggju og óvíst hvenær landfestar verði leystar á ný. Gísli vonast til að línur taki að skýrast fljótlega eftir páska. Segist hann ekki bjartsýnn á skipakomur í maí og júní, en vonir standa til að úr rætist upp úr því.
Leiðrétt 7:45 Gísli Gíslason er hafnarstjóri Faxaflóahafna, ekki stjórnarformaður eins og sagði upphaflega í fréttinni.
