Mynd: Adrienn - Pexels
Athugið þessi frétt er meira en mánaðargömul.
Smitrakningarforrit aðgengilegt í iPhone og Android
Smitrakningarforritið sem almannavarnir og landlæknir hafa látið hanna er orðið algengilegt, bæði fyrir iPhone og Android síma. Forritið á að hjálpa til við að greina ferðir einstaklinga sem smitast af COVID-19 eða ef grunur leikur á smiti. Með forritinu á að vera hægt að rekja ferðir fólks saman við ferðir annarra.
Á upplýsingasíðu um forritið segir að gögnum um staðsetningu fólks verði safnað nokkrum sinnum á klukkustund. Þau verða vistuð í fjórtán daga og eldri gögnum eytt. Fólk sem setur forritið upp í síma sínum þarf að veita samþykki sitt áður en forritið byrjar að safna gögnum um ferðir þess. Ef fólk greinist með COVID-19 getur rakningateymi almannavarna beðið fólk að dreila gögnunum með þeim. Smitrakningateymið getur ekki sótt gögnin án samþykkis þess sem setti forritið upp.
Á upplýsingasíðunni segir að því fleiri sem sæki appið því betri og skilvirkari verði upplýsingarnar sem hægt er að vinna úr því.
