Athugið þessi frétt er meira en mánaðargömul.

Skæð og harðger veira drap kanínurnar í Elliðaárdal

31.03.2020 - 16:03
Mynd með færslu
 Mynd: Gunnlaugur Starri Gylfason - RÚV/Landinn
Rannsóknir á lifrarsýnum úr kanínum, sem drápust í Elliðaárdal nýlega, hafa staðfest að orsök dauðans er smitandi lifrardrep vegna veirunnar RHDV2, eða Rabbit Hemorhagic Disease Virus 2. Þetta kemur fram í tilkynningu frá Matvælastofnun. 

Smitar ekki fólk

Veiran er harðger og lifir lengi í náttúrunni í lífrænum úrgangi. Veiran smitar auðveldlega og getur einnig borist hratt á milli svæða með villtum fuglum, öðrum dýrum eða fólki. Veiran getur þó einungis smitað kanínur en ekki fólk né önnur dýr.

Mikilvægt er að fólk sem á kanínur heima forðist að ferðast um á þekktum smitsvæðum, svo sem í Elliðaárdalnum, og gæti smitvarna eins og hægt er heima fyrir með því að minnka umgang ókunnugra við kanínurnar og viðhafa ýtrustu smitvarnir við aðbúnað, fóðrun og umhirðu þeirra. 

Uppgötvaðist fyrst árið 2010

RHDV2 afbrigði veirunnar var fyrst uppgötvað í Frakklandi árið 2010 en hefur breiðst út víða um heiminn. Síðustu ár hefur farið fram þróun á bóluefni gegn RHDV2 stofninum, en bóluefni gegn RHDV1 sem var fyrir á markaði dugar ekki. Lyfjastofnun Evrópu gaf út markaðsleyfi í Evrópusambandslöndunum fyrir bóluefni gegn báðum RHDV stofnunum í nóvember, en bóluefnið er enn ekki komið á almennan markað Evrópu. Matvælastofnun hefur leitað til lyfjainnflytjenda að kanna möguleika á að flytja inn bóluefni svo kanínueigendur geti varið dýr sín fyrir þessum skæða sjúkdómi.

Jón Hákon Halldórsson
Fréttastofa RÚV